Agjencia për Barazi Gjinore në Zyrën e Kryeministrit ka mirëpritur sot në takim znj. Belén Sanz Luque, Drejtoreshë Rajonale e UN Women për Evropë dhe Azi Qendrore, e cila po qëndron për vizitë zyrtare në Kosovë. Znj. Sanz Luque ishte e shoqëruar nga znj. Vlora Nushi, Drejtoreshë e Zyrës së UN Women në Kosovë.
Gjatë takimit u diskutua për bashkëpunimin e vazhdueshëm ndërmjet Agjencisë për Barazi Gjinore dhe UN Women në Kosovë, si dhe për prioritetet kombëtare në fushën e barazisë gjinore. Palët ndanë mendime mbi mënyrat e forcimit të partneritetit institucional dhe thellimit të bashkëpunimit në mbështetje të avancimit të të drejtave të grave, fuqizimit të tyre në jetën publike dhe ekonomike, si dhe në përmirësimin e politikave gjinore në nivel kombëtar dhe lokal.
Në këtë kuadër, u theksua rëndësia e koordinimit të ngushtë ndërinstitucional dhe e mbështetjes së vazhdueshme të UN Women në zbatimin e politikave publike që synojnë zhvillim të barabartë dhe gjithëpërfshirës.
Të dyja palët shprehën gatishmërinë për të vazhduar dhe forcuar partneritetin në realizimin e politikave dhe iniciativave që kontribuojnë në barazi gjinore, drejtësi sociale dhe zhvillim të qëndrueshëm në Kossovë.