Lajme

Agjencia për Barazi Gjinore/Zyra e Kryeministrit mirëpriti sot në takim Delegacionin për Miqësinë mes Grave. Ky delegacion është një organizatë jofitimprurëse, jopolitike, e përbërë nga gra profesioniste nga gjithë Shtetet e Bashkuara, që mbështet miqësinë midis grave nga SHBA-ja dhe vendeve të tjera. Ai synon të krijojë mundësi për të kuptuar dhe shkëmbyer eksperienca profesionale e jetësore, si dhe të njohë sfidat dhe mundësitë që gratë hasin në mbarë botën.

Delegacioni është i përkushtuar ndaj shkëmbimit të ideve, të nxënit dhe krijimit të miqësive me gra që punojnë për të sjellë ndryshim në vendet jashtë Shteteve të Bashkuara. Anëtaret e delegacionit, ndër vite, kanë takuar shumë “Gra me Ndikim”, nga Nënë Tereza te Golda Meir, si dhe organizata e grupe të grave të OJQ-ve.

Agjencia për Barazi Gjinore prezantoi mandatin e saj institucional, situatën e grave dhe vajzave në Republikën e Kosovës, kornizën ligjore dhe mekanizmat institucionalë për barazinë gjinore. U vu theksi në masat dhe ndërhyrjet e Qeverisë së Republikës së Kosovës në zbatimin e të drejtave të garantuara për agjendën e barazisë gjinore, me fokus në: rritjen e qasjes në fondet publike, të drejtat pronësore, masat për punësim dhe edukim, sensibilizimin, parandalimin dhe trajtimin e dhunës ndaj grave dhe vajzave.

Nga Delegacioni për Miqësinë morën pjesë:

1. Joanna Millick

2. Ashley O'Connor

3. Kimberly Harms

4. Suzanne Connolly

5. Flora Kubitz

6. Darlene Miller

7. Carolyn Moats

8. Barbara Pritchard

9. Nancy Uscher

10. Kathy Zebrowski Heller

11. Christine Zak